Poem: ഒരു മൂക ജീവി പോലും ചോദിക്കുന്നു

അല്ലയോ മനുഷ്യപുത്രാ ! :

സംസ്കാര സമ്പന്നനായ നീ

സർട്ടിഫിക്കറ്റുകളുടെ

കൂംബാരങ്ങളുള്ള നീ

മതത്തിന്റെയും,

പാർട്ടിയുടേയും,

പേര് പറഞ്ഞു വഴക്കിടുന്നു..

നിന്റെ തന്നെ തലയെടുക്കാൻ

കൊട്ടേഷൻ കൊടുക്കുന്നു

തമ്മിലടിക്കുന്നു.. ചോര ചിന്തുന്നു ...

മുതലെടുപ്പ് നടത്തുന്നു ....

സ്നേഹം വറ്റിയ ഈ ഭുമിയിൽ

നീ ചിന്തിയ ചോരയുടെ കറ

മായ്ച്ചു കളയാൻ

ഞാൻ നക്കിത്തുടക്കുന്നു..

എന്നിട്ടും നീ എന്നെ

സംസ്ക്കാരമില്ലാതെ വിളിക്കുന്നു:

"എടാ സംസ്കാരമില്ലാത്ത നായെ"

നീ ചെയ്ത വൻപാപം തെളിയിക്കുവാൻ

ഞാൻ മണം പിടിച്ചു നടക്കുന്നു

എന്നിട്ടും നീ എന്നെ

സംസ്ക്കാരമില്ലാതെ വിളിക്കുന്നു :

" എടാ മഹാപാപിയായ നായെ"

നീ അമിതമായി ഭക്ഷിച്ചു

തള്ളിയ എച്ചിലുകൾ

ഞാൻ തിന്നു വൃത്തിയാക്കുന്നു

എന്നിട്ടും നീ എന്നെ

വൃത്തിയില്ലാതെ വിളിക്കുന്നു :

"എടാ വൃത്തികെട്ട നായെ"

സുരക്ഷിതത്വം നഷ്ട്ടപെട്ട

നിനക്ക് വേണ്ടി

രാവിൽ ഉറങ്ങാതെ

ഞാൻ കാവൽ നിൽക്കുന്നു

എന്നിട്ടും നീ എന്നെ

നന്ദിയില്ലാതെ വിളിക്കുന്നു:

" എടാ നന്ദികെട്ട നായെ"

Drawing : (Courtesy)

..........................................................................

(ആദ്യത്തെ ഫോട്ടോ ഹൃദയമില്ലാത്ത ഞാനടക്കമുള്ള ഇന്നത്തെ മനുഷ്യപുത്രനെ പ്രതിനിധീകരിക്കുന്നു ! രണ്ടാമത്തെ ഫോട്ടോ ഹൃദയമുള്ള ഒരു നായയെ പ്രതിനിധീകരിക്കുന്നു !)

K.M.A Paruthikkadu